Cəzaçəkmə müəssisələrinə narkotik və psixotrop maddələrin keçirilməsinin qarşısı alınmışdır (foto)
2-01-2021, 10:48 | 433 dəfə oxunub
Penitensiar xidmətin əməliyyat aparatının həyata keçirdiyi əməliyyat-axtarış tədbirləri nəticəsində 1 saylı cəzaçəkmə müəssisəsinə və Müalicə müəssisəsinə narkotik və psixotrop maddələrin keçirilməsi cəhdinin qarşısı alınmışdır.
Cinayət Məcəlləsinin 181.2.1; 181.2.4; 181.2.5; 177.2.1; 177.2.2; 177.2.3; 326.2; 66.3 və 67-ci maddələrinə əsasən təqsirli bilinərək 13 il 6 ay müddətinə azadlıqdan məhrum edilmiş və hal-hazırda 1 saylı cəzaçəkmə müəssisəsində cəza çəkən məhkum Xəlilov Şafaddin Fidayət oğlu ilə qısamüddətli görüşə gəlmiş oğlu Bakı şəhər sakini Xəlilov Tahir Şafəddin oğlu tərəfindən gətirilmiş sovqata baxış keçirilən zaman orada olan kartofun içərisində xüsusi üsulla gizlədilmiş sellofan bükülüdə ümumi çəkisi 7,2 qram olan narkotik maddə - heroin aşkar edilmişdir.
Cinayət Məcəlləsinin 126.3; 228.1; 229.1; 66.3 və 67-ci maddələrinə əsasən təqsirli bilinərək 11 il 6 ay müddətinə azadlıqdan məhrum edilmiş və hal-hazırda Müalicə müəssisəsində cəza çəkən məhkum Şərifov Etiram Bəxtiyar oğluna tanışı Abşeron rayon sakini Rəsulzadə Bayram Fatik oğlu tərəfindən göndərilmiş sovqata baxış keçirilən zaman orada olan hamam dəsmalının tikiş yerlərində xüsusi üsulla gizlədilmiş 4 ədəd sellofan bükülüdə ümumi çəkisi 2,007 qram olan narkotik maddə - heroin və ümumi çəkisi 2,448 qram olan psixotrop maddə - metamfetamin aşkar edilmişdir.
